Li ber derî - Abdulla Peşew

9 Mayıs 2015 Cumartesi

Li ber derî

Şev bû dereng
Çoka min sist bû
Hîv li nav ezman kizirî
Derê xwe li min veke
Îşev hatime
Ji çinîna baqek ji nergizên çavê te
Bo razanek, bo xewnek, bo hin girîn
Li ser ewrê porê te yê xav
Îşev hatime
Çirîska bajarê yadîgar bangî min kir
Bi sîma zarotiya xwe ve
Bi xema şorebiya xwe ve
Hatime û venagerim
An digihîjim te
An wek momekê dişewetim û dihelim

Derê xwe li min veke
Ez dildarê te yê cara me
Her zeviya ber derê te me
Her tîna berf û barana te me
Derê xwe li min veke
Ez ew kes im
Heta do
Li nav gewriya ronahiyê te ez vedişartim
Li nav tasa tirsê te ez vedixarim

Dem: Li bin baskê ezman dike bawîşk were
Şûn: Reşikeke bêdeng e
Derî li min veke
Tiştek nîn e şîrîntir be
Ji xişta pê û çip çipa lêvê
Deriyê xwe li min veke
Westayê riyek dûr im
Wekî caran hinekî rûdinim û radibim

Şev bû dereng
Çoka min sist bû
Hîv li nav ezman kizirî
Derê xwe li min veke
Dar û kevirên devê derî xwe davêjin te

Abdulla Peşew

yorum | | Devamı...

Sedan Sal e - Abdulla Peşew

11 Nisan 2015 Cumartesi

Sedan Sal e

Sedan sal e
Di mala xwe yî wêran de
Ez pisîka kor î kuncikê midbexa siltan im
Sedan sal e
Hewş û ber hewşa min vala ye
Li ber deriyê dizên xwe pasewan im.
Sedan sal e
Weke çengek dan
Aşê dîrokê ez avêtime
Her çar dorê'm qulên gêrika ne û
Mûrî dev dane nava min
Sedan sal e
Tasa serê'm minare ye
Kî tê û dengê xwe tê de hildide
Sedan sal e
Niştimana min nêrgele ye
Kî tê li devê xwe digire
Sedan sal e
Li ber derê tekiya dinê
Cotek solên bipîne me
Kî min li xwe dike
Ji bo wî me
Sedan sal e
Piştî terîşekê
Têm avêtin
Sedan sal e
Piştî pînekê
Min li xwe dikin

Ez pişteke birîndar im
Li ber qamçiyê xwe rabûme
Ez lehiyek bêxuy im
Li ber keviyan rabûme
Ku dor li min teng kirine

Ez danaynim!
Careke din ranazim ez

Bê aram im
Arama min çirayek bû
Bareşê dora min
Xwîna wê rijand

Bê rehm im
Rehma min deryayek bû
Bi yek bêhnê vexwarin ew

Ez danaynim
Careke din ranazim ez

Ku ez dan bim
Kanî îmkan?

An ez an mûrî!

Ku ez xwîn bim
Kanî îmkan?

An ez an zîlo!

Xayîn in ewên dibêjin
"Dan û mûrî birayên hev in“

Xayîn in ewên dibêjin
"Xwîn û zîlo birayên hev in“

 Xayîn in ewên dibêjin
"Masî û çengel
Dest û derzî
Werîs û gerden
Dûzan û mû birayên hev in“

Werin xelkno!
Ji nêçîr û birînê bipirsin
Bêjin Xwedêkî
Xencer heye birîn derman bike?
Nêçîrvan heye, nêçîr nexwe?

De xelkno!
Ji kayê bipirsin
Tu car agirê sar dîtiye?
Ji hêlîna teyr bipirsin
Bi niyeta maçê tu car mar devê xwe kiriye wê?
De ji dara berrû bipirsin
Bivir dîtiye darbirr nebe?
De ji kerekê jî bipirsin
Gur dîtiye kerxwur nebe?

Xayîn in ewên dibêjin
"Marê şîrînjahr jî heye"
Xayîn in ewên dibêjin
"Bivrê birê dar jî heye"

Ez pişteke birîndar im
Li ber qamçiyê xwe rabûme
Ez lehiyek bêxuy im
Li ber keviyan rabûme
Ku dor li min teng kirine
Ez danaynim!
Careke din ranazim ez

Abdulla Peşew

yorum | | Devamı...